La Madona Pelegrina de Fatima te Gherdëina a 100 ani dala cumparida – lugio 2017

L’ena dai 24 de nchin ai 30 de lugio, dal lunesc ala dumënia, ie unida purteda te nosta pluanies dla Union Pasturela de Gherdëina la statua dla Madona pelegrina de Fatima. La bela statua che on pudù veneré y amiré ie unida fata dan passa 50 ani da n scultëur a Fatima tl lën de rëur dl Mediteran (Stein-Eiche), lën tëut al luech dla cumparizion dla Madona ai trëi pastri.
Don Vittorio de Paoli, che ie l respunsabl dla sezion taliana dl Apostolat de Fatima a Milan, à purtà la Madona de Fatima tla Pluanies dla Union Pasturela de Gherdëina. La Madona ie unida tëuta su dala jënt te duta la pluanies cun gran ntujiasm y partezipazion sibe dala jënt da tlo che da truep seniëures.
Don Vittorio l’à acumpanieda te duta la pluanies y tla funzions y S. Mësses che ël a tenì al sapù da purté l spirt dl messaje dla Madona ala jënt, che se à riesc lascià tré pea te chëi mumënc de priera, meditazion, chiet, de cunfort y datrai nce da mumënc de cumuzion.
Ël ie unì judà ntan duta l’ena Mariana da seniëur digan Vijo Pitscheider, dai prevesc dla pluanies a da chëi che fova tlo al frësch, da chëi che a dit dant la Curones, dai cores, mujighes y grupes musicheles y da duc chëi che che a judà y che se a cruzià a meter a jì la manifestazions ntan l’ena.
Trëi iedesc ie la Madona unida purteda n pruzescion, nsci n merdi danmesdì da dlieja demez nchin tla Cësa de Paussa per ancunté la jënt de tëmp y duc chëi che lëura tla Cësa. Do l salut a duc, ti à don Vittorio dat la benedescion a uni un persunalmënter ti fajan l sëni dla s.Crëusc sun la fruent ntan che la jënt dijova la Curona.
N chëla sëira ie unida tenida la pruzescion cun i cëiresc da dlieja s. Durich nchin ja S. Antone y inò de reviers, pruzescion acumpanieda dala mujiga de Urtijëi y dal cor de dlieja. N chëla sëira an pudù udëi tan de jënt che la Madona de Fatima a cherdà adalerch, mei ne an udù tan truepa jënt a na pruzescion.
Te duta la dliejes de Gherdëina se à abinà truepa jënt a veneré la Madona, nsci nce l ultimo dì pra la gran S. Mëssa de conclujion dla vijita, n dumënia da mesa la undesc. A liejer la Mëssa fova seniëur Digan, don Vittorio y autri cin prevesc. L cor de dlieja de Urtijëi a ciantà la “Krönungsmesse” de Mozart renfurzà da plu ciantarins y strumentalisć di cores de Gherdëina che se à metù a desposizion de cianté y suné pea. Do i rengraziamënc a don Vittorio da pert de nosc digan Vijo Pitscheider y dl presidënt dl Union Pasturela Georg Kostner, ie mo la Madona de Fatima unida purteda n prucescion sun plaza de dlieja per l ultimo salut.

PROGRAM DL’ENA

 

 

 

Ena dl Crëidum a Urtijëi dai 22 nchin ai 30 de stëmber 2018

Do 26 ani che ie stat la ultima Miscions tla Pluania de Urtijëi, à l pluan Sn. Vijo Pitscheider purtà tl Cunsëi de Pluania la pruposta de ulëi inò meter a jì na tel manifestazion. Si mutivazion fova chëla de n sustëni ai fediei dla pluania per mantenì y renfurzé l crëidum. L Cunsëi de Pluania à tëut su gën chësta idea se tulan su l lëur de judé a urganisé na tel Ena dl Crëidum. L pluan dij che te chisc tëmps, ulache la sozietà se à tan mudà, dantaldut tres i media nueves, ruvel tla cëses ideologies nueves che muda truep la maniera de viver da uni di, nsci ne daussa la dlieja nia resté tacheda mé pra la vedla tradizions, y l ie ëura de cri formes nueves per viver y dé inant la fede te nosc luech.
Ajache l ie de bujën de cialé ala situazion de nosta pluania cun uedli nueves, a nosc pluan tëut su cuntat cun na grupa de patri de Vicenza che à gran esperienza a mëter a jì tel miscions. Bele d’autonn dl 2017 ie nsci n valguni de ëi unic adalerch per mparé a cunëscer nosta pluania y ti fajan na pruposta al Cunsëi de Pluania de co meter a ji na tel ena, tenian cont de si esperienzes fates te d’autra pluanies. Deberieda te plu ancuntedes iel pona madurì cun l tëmp n bel program, pensan dantaldut ala families jëunes y ai sculeies de duta la scoles. Nsci iel unit a s’l dé n program drët rich per granc y pitli te nosta pluania. Nsci ie unida metuda a jì “L’Ena dl Crëidum” Dai 22 ai 30 de setëmber 2018 àn pona metù a jì “L’Ena dl Crëidum cun l argumënt “Cuntëde dla speranza che ie te vo”.
Ai 22 de setëmber iel nscì unit adalerch bën 17 “miscioneres” danter patri, munighes y laics, che nes à menà tres duta l’ena. La ulentà di patri fova chëla de rujené y ancunté plu persones che la va. Nsci iel stat truepa ancuntedes per uni età. Cun l sustëni dla diretëures dla scoles à i patri pudù ancunté te scola duc i sculeies y studënc.
L ie stat ancuntedes per i mutons sa la dlieja da Sacun y te Val d’Anna, cun i jëuni ti locai “Saut” y “Assudëi” y tl ustaria Traube, per la families te de plù cëses privates, ancuntedes per duc àn fat tla ustaries y per i nëinesc te sala de Calonia. L ie nce stat na ancunteda cun i artisc te na berstot, y cun i vedli tla Cësa de Paussa. Sambën ne manciovel nia la santa mësses, adurazions cun l Santiscimo y vespres, ulache i patri tulova l’ ucajion per nsenië la dutrina te na maniera nueva. Lie nce unì dat la ucajion de se pisté o de rujené persunalmënter cun un o l auter pater o muniga.
L merdi ie stat n cunzert cun meditazion cun l Cor de Dlieja de Urtijëi y la grupa de Jëuni “Cominais”. La sada sëira ie mo stat la pruzescion cun i cëiresc, ulache la jënt, mueta da plu pertes de Urtijëi se à pona ancuntà sun plaza dlongia la dlieja de S. Antone, purtan nsci na bela testemunianza de fede. L’Ena dl Crëidum ie pona fineda la dumënia cun la gran mëssa de rengraziamënt acumpanieda dala grupa “Helios”. Ala fin a Sn. Digan rengrazià dassënn duc i miscioneres che fova per chësta ucajion cun ël sun autere. Cun n bel aplaus à la jënt dl luech ulù sentì gra de cuer ai miscioneres de dut l bon lëur che i à fat ntan duta l’ena.
I miscioneres à sapù da nes mustré su che la fede possa nes judé a viver te n spirt positif, y sce se lascion avisé dal gran amor de Die pudons viver cun speranza y crëta te chisc tëmps d’al didancuei, pensan nce a cri formes nueves per dé inant nosc crëidum.
Pudon di che l’ena ie garateda dassënn, truepa jënt a fat pea cun legrëza y à pudù se tò pea velch che juda a jì inant tla vita spirituela. Tla crëta che l’Ena dl Crëidum porte fruc per la fede te nosta Pluania, rengrazions duc chëi che a judà y prià pea per l garaté de chësta bela ena.