“Cialé de cunëscer i sënies dl tëmp y i nterpreté aldò dl vaniele”, chësta ie una dla cosses de majera mpurtanza che se damanda l cunzil vaticanum II bele dan plu de 50 ani (GS4).

Te chisc 50 ani se à mudà truep tla dlieja: la bona tradizions an cialà de mantenì, ma nce truep de nuef ie unì docà. Per vester boni de mantenì viva nosta dlieja, vala de bujën che i laics tole pert ala vita dla pluania. Tres la ciarestia de prevesc te nosta Diozeja an udù ite che la và de bujën de strutures nueves per vester boni de tenì su nce per l daunì na vita pasturela te duta la pluanies. Metan adum de plu pluanies che ie tla medema situazion y che à plu o manco i medemi bujëns se sparaniun truepa forzes y n possa fé truep deberieda. I laics muessa tlo se sëurantò na gran respunsabeltà. Me tres n gran sustëni da pert di laics pudran garantì che la cura dl’anes vede inant tla pluanies.

 Tres l decret dl Vescul di prims de jené dl 2012 ie unida metuda su la Union Pasturela Gherdëina, de chëla che fej pert Urtijëi, Bula y Rucadic, Santa Cristina y Sëlva. Chësta Union nes dà la chance che cun l aiut dl Spirit Sant abinun troies nueves tl’evangelisazion, tla vita pasturela dla pluania cun si mumënc nce de festa. Chësta Union ie unida njinieda ca per trëi ani alalongia y sën vëniel pità regularmënter scumenciadives, azions y festes a livel de dut l Decanat. Var per var muessa la jënt crëscer y se adaté a chësta situazion nueva, sentì y lascé pro che zeche se mude tl Decanat. Uni cristian dëssa tò pert ativamënter ala vita dla pluania, aldò de si talënc y de si puscibelteies.

Tl daunì muessa se mantenì la vita pasturela tla singula pluania dassëula. L cunsëi de pluania, l cunsëi aministratif, l cor de dlieja y l’autra lies y grupes tla pluania fajerà inant si atività a bën dla pluania. La festes y i sacramënc ne pudran per via di puech prevesc nia plu tenì sciche mo al didancuei. La catechesa di sacramënc, l lëur cun i pitli y cun i jëuni, i cursc per l crëidum y l lëur caritatif unirà lià ite te na rë a na maniera che la singula pluanies vënie sustenides te si lëur. N cialerà de mëter a jì puscibilmënter proiec che va sëura i cunfins dla singula pluanies ora a na maniera che n sparania forzes y scioldi.

L Cunsëi dla pluanies dl’Union Pasturela Gherdëina ie metù adum dal Digan y da d’autri prevesc,  dal’assistënta y da doi rapresentanc de duta la pluanies.
La singula pluanies ie ublighedes a se tenì ala deliberes dl cunsëi dla pluanies. L Cunsëi dla pluanies y l Cunsëi de pluania dura nfat giut.