L cor dai ëi Raetia de Urtijëi ie uni metù su ai 18. de mei dl ann 1963. Nleuta cumpedovel 32 ciantarins. 1. dirijënt fova Johann Moroder dl Mëune, che ie stat a ce dl cor nchin al ann 1997, ora de vel curta sostituzions danterite y l à sapù dal mené drët bën. Dal 1997 al ann 2011 à l Cor ciantà sota la bacheta de Pepi Huber. L numer di ciantarins fova for danter 30 y 40. L cor cianta pec populeres, de dlieja y dla tlassica te la rujenedes tudësch, ladin, talian y nglëisc y l se à fat n drët bon inuem ënghe oradecà. Da numiné iel cunzerc de‘Avënt a Minca y Salzburg, la partezipazion pra cuncorsc a Praga y Barcellona, n grum de cunzerc tl Deutschland, tl Österreich, tla Ungheria y tla Talia, coche per ejëmpl tla catedrala de S. Piere tl Vatican. L cianté dl cor arrichesc la vita culturela dl luech y dla val (l vën ciantedes mësses, mësses da mort, nozes y pra festes tradiziuneles sce per i destudafuech, i scizeri, Segra Sacun, mëssa de mei, mëssa sun Resciesa, “Bunter Abend”, Unissant, Rorate, n Nadel y n. i.). L cor dai ëi Raetia à aldidancuei 23 ciantarins che cianta sota la bacheta de Claudio Kerschbaumer. Presidënt ie dal ann 2011 Wilfried Math.

Wilfried Math (presidënt)
Claudio Kerschbaumer (Dirighënt)